■ 2 uie, gekap
■ Olie
■ 1 kg beesmaalvleis
■ 1 groot patat, in blokkies gesny
■ 15 ml kerriepoeier of garam masala
■ 15 ml borrie
■ 5 ml bruinsuiker
■ 45 ml blatjang
■ 125 ml gedroogte appelkose
■ Sout en peper
■ 1 sny volgraanbrood
■ 1 eier, liggies geklits
■ 60 g botter
■ 4 eiers
■ 125 ml amandelsplinters of -vlokkies (opsioneel)

Verhit ’n groot braaipan en braai die uie in ’n skeut olie tot deursigtig. Voeg die maalvleis by en hou aan roer tot die maalvleis gaar en krummelrig is. Voeg die patat, kerriepoeier, borrie, suiker, blatjang en appelkose by. Meng goed. Geur en haal dan van die warm plaat af.

Week die brood in ’n bietjie water en druk daarna die water uit. Druk die brood fyn en meng by die geklitste eier in. Voeg dit by die maalvleismengsel en meng deur. Kook die bobotiemaalvleis terwyl jy deurgaans roer tot dit gaar is.

Maak klein holtes in die maalvleis en stip elk met ’n klontjie botter. Wanneer die botter gesmelt is, kan jy ’n eier in elke holte breek. Kook tot gaar na smaak. Sit voor saam met die amandels (opsioneel), vrugteblatjang en ’n vars mengelslaai. Lewer 6 porsies.

■ 125 g botter, gesmelt
■ 30 ml olyfolie
■ 6-8 uie, in skyfies gesny
■ 2 knoffelhuisies, gekap
■ 2 lourierblare
■ 2 takkies vars tiemie, gebruik slegs die blare
■ Sout en peper
■ 190 ml witwyn
■ 15 ml suiker
■ 45 ml koekmeel
■ 1 liter hoender- of groenteaftreksel
■ Halwe draairooster- (rotisserie) of oorskiethoender, fyngepluis
■ 100 g spinasie, fyngesnipper
■ Halwe Franse brood, in dik snye gesny
■ 125 ml gerasperde gruyèrekaas

Meng die botter, olyfolie, uie, knoffel, lourierblare, tiemie, geurmiddels, wyn en suiker in ’n groot kasserol. Bak vir 10 minute, roer dit een keer deeglik deur en bedek met aluminiumfoelie.

Bak vir nog 20 minute, of tot die uie baie sag gekook het en gekaramelliseer het. Sprinkel die meel oor die gereg en roer dit deeglik daarby in. Voeg die aftreksel, hoender en spinasie by, en bak vir nog 10 minute. Skakel die oondrooster aan.

Rangskik die snytjies brood bo-op die bredie en sprinkel die kaas oor. Oondrooster onder die oond se roosterelement vir 4-5 minute tot die kaas borreltjies maak. Lewer 4-6 porsies.

Min moeite – en nog minder skottelgoed!

Die lewe is besig genoeg. Spaar tyd en elektrisiteit met ’n rits opwindende resepte vir etes wat in een bak, een pot of op een bakplaat gemaak word.

Die bekende broer-en-susterspan, Callie Maritz en Mari-Louis Guy, maak die lewe makliker met hul nuwe boek, EEN pot/pan/bakplaat. Moeitelose, geurige resepte en vars smaakkombinasies met bees, hoender, varkvleis, wors en vleislose geregte, om maar ’n paar van die afdelings te noem.

EEN pot/pan/bakplaat is ideaal vir besige kokke, ma’s en pa’s wat nuwe aandete-idees soek en almal wat ná ete gewoonlik ’n hoop kastrolle, bakplate en panne moet was! EEN pot/pan/bakplaat is by alle boekwinkels te kry en kos R280.

■ 2 uie
■ 10 groot wortels, geskil
■ Olyfolie
■ 1 cm-stuk vars gemmer, geskil en fyngekap
■ 15 ml tamatiepasta
■ 1 aartappel, geskil en in blokkies gesny
■ 1 liter groente-aftreksel of sterk rooibostee
■ Sout en peper
■ Gerasperde skil en sap van 1 groot lemoen
■ Pienk peperkorrels en mikrokruie vir garnering
■ Growwe stukke roosterbrood om saam voor te sit

Laat sweet die uie en wortels in olyfolie in ’n groot pot oor matige hitte. Die uie moet karamelliseer en die wortels sal helder oranje verkleur.

Voeg die gemmer by en kook vir nog ’n minuut terwyl jy dit aanhou roer. Voeg die tamatiepasta, aartappel en groente-aftreksel by. Prut oor matige hitte vir ongeveer 30 minute tot die groente sag is. Geur na smaak met sout en peper.

Klits die mengsel met ’n stokmenger tot glad. Roer die lemoenskil en -sap in. Garneer met pienk peperkorrels en mikro-kruie. Lewer 4-6 porsies.

Min moeite – en nog minder skottelgoed!

Die lewe is besig genoeg. Spaar tyd en elektrisiteit met ’n rits opwindende resepte vir etes wat in een bak, een pot of op een bakplaat gemaak word.

Die bekende broer-en-susterspan, Callie Maritz en Mari-Louis Guy, maak die lewe makliker met hul nuwe boek, EEN pot/pan/bakplaat. Moeitelose, geurige resepte en vars smaakkombinasies met bees, hoender, varkvleis, wors en vleislose geregte, om maar ’n paar van die afdelings te noem.

EEN pot/pan/bakplaat is ideaal vir besige kokke, ma’s en pa’s wat nuwe aandete-idees soek en almal wat ná ete gewoonlik ’n hoop kastrolle, bakplate en panne moet was! EEN pot/pan/bakplaat is by alle boekwinkels te kry en kos R280.

Hoender Marbella is ’n gewilde gereg wat met pruimedante, groen olywe en ’n soeterige sous van bruin suiker en asyn, kappertjiesade en oreganum gemaak word. Die geure pas wonderlik by mekaar. Ek het dit ’n bietjie vereenvoudig en dit met borsfilette gemaak.

■ 8 groot hoenderborsies sonder vel of been
■ 6 knoffelhuisies, fyn gekap
■ 30 ml fyn gekapte vars oreganum
■ Sout en swartpeper na smaak
■ 45 ml rooiwynasyn
■ 45 ml olyfolie
■ Groot hand vol ontpitte pruimedante
■ 30 ml kappertjiesade
■ 2-3 vars lourierblare
■ 45 ml bruinsuiker
■ 60 ml witwyn
■ 1 groot ui, in wiggies gesny
■ 45 ml gekapte vars pietersielie

Maak vlak insnydings op elke borsfilet. Meng al die bestanddele, behalwe die uie en pietersielie, saam in ’n bak en laat die hoender daarin marineer vir minstens 4 uur, maar verkieslik oornag.

Voorverhit die oond tot 180°C en skep die hoender uit die marinade in ’n oondbak. Voeg die uie by en skep die pruimedante bo-oor die hoender. Giet al die marinade uit die bak en oor die hoender. Bedek en bak vir ongeveer 20 minute.

Haal dan die foelie of deksel af en bak verder tot die hoender gaar is (as jy ’n mes in die dikste deel steek en die sappe wat uitloop, is helder). Sprinkel gekapte pietersielie oor. Sit voor met koeskoes en slaai. Lewer 6-8 porsies.

Maaskaasdeeg
■ 625 ml koekmeel
■ 5 ml sout
■ 250 g koue botter
■ 1 houer (230 g) gladde maaskaas
■ ’n Paar druppels yswater

Vulsel
■ 1 blokkie hoenderaftreksel
■ 45 ml elk botter en koekmeel
■ 500 ml warm hoenderaftreksel
■ 125 ml room
■ 15 ml olie
■ 1 groot ui, fyn gekap
■ 2 knoffelhuisies, fyn gedruk
■ 3 repe bladspek, fyn gesnipper
■ 250 g bruin sampioene, gesnipper
■ 750 g gaar hoender, gevlok
■ 600 g babaspinasie, fyn gekerf
■ Sout en vars gemaalde swartpeper na smaak
■ 1 eier, geklits
■ 30 ml melk

Maak die deeg in ’n voedselverwerker:
Verwerk die meel en sout saam. Voeg die botter by en pols tot krummelrig. Voeg die maaskaas by en pols tot net gemeng (voeg ’n paar druppels yswater by indien nodig, om die klam krummels aan mekaar te laat vaskleef).

Keer die deeg uit op ’n stuk kleefplastiek, druk platter en verkoel tot nodig. (Die deeg vries ook goed en hou lank in die yskas.)

Vir die vulsel: 
Druk die aftrekselblokkie met ’n vurk fyn en meng met die botter. Skep dit in ’n groot kastrol en verhit tot gesmelt. Voeg die meel by en roer tot die mengsel borrel. Voeg die aftreksel en room by en verhit, terwyl geroer word, tot kookpunt. Prut liggies vir 2-3 minute.

Verhit die olie in ’n pan en braai die ui, knoffel en spek stadig daarin tot gaar. Voeg die sampioene by en braai tot gaar. Voeg nou die gaar hoender en spinasie by en giet die sous bo-oor. Verhit tot deurwarm en geur na smaak met sout, peper en tiemie. Skep die vulsel in ’n groot pasteibak en laat dit afkoel tot kamertemperatuur.

Voorverhit die oond tot 220°C. Rol die deeg uit op ’n meelbestrooide oppervlak. Sny ’n stuk uit wat groot genoeg is om die vulsel te bedek. Bedek die vulsel met die deeg en gebruik afvalstukkies om dit bo-op te versier. Klits die melk en eier saam en verf die deeg daarmee.

Bak die pastei vir 10 minute en verlaag die oondtemperatuur tot 160°C. Bak vir ’n verdere 30 minute tot die kors goudbruin en gaar en die vulsel deurwarm is. Sit voor met rys en slaaie. Lewer 8-10 porsies.

■ 3-4 boud- en dyporsies
■ Sout, peper en hoenderspeserye
■ 30 ml olie
■ 15 ml heuning
■ 15 ml worcestersous
■ 3 knoffelhuisies, dun gesny
■ 500 g jong Brusselse spruite
■ 100 ml witwyn
■ 100 ml hoenderaftreksel
■ 100 ml room
■ Mespunt aangemaakte mosterd

Voorverhit die oond tot 190°C en voer ’n bakplaat met foelie uit. Smeer liggies met olie of spuit met kleefwerende kossproei.

Geur die hoenderporsies met sout, peper en hoenderspeserye. Meng die helfte van die olie, die 15 ml heuning en 15 ml worcestersous saam en verf die hoenderporsies daarmee.

Oondrooster vir 30-40 minute, terwyl jy nou en dan die hoenderstukke verf met die marinade, tot die hoender goudbruin, maar nog nie heeltemal gaar is nie. Haal uit die oond en hou eenkant.

Verhit die res van die olie in groot pan en braai die knoffel en Brusselse spruite liggies daarin tot die spruite effens begin karameliseer. Voeg die witwyn by en laat vinnig opkook. Prut tot die wyn met die helfte afgekook is en voeg dan die hoenderaftreksel, room en mosterd by. Verhit tot kookpunt en prut vir ’n paar sekondes.

Sit die hoenderstukke terug in die pan saam met enige pansouse wat in die gaarmaakproses gevorm het. Bedek en laat prut tot die hoender en spruite sag en gaar is. Sit voor met rys of koeskoes. Lewer 3-4 groot porsies.

Broccoli of aspersies is net so lekker saam met soet, klewerige sous.

■ 8 hoenderborsies, sonder vel en been
■ 30 ml heuning
■ 30 ml sojasous
■ 45 ml rooiwynasyn
■ 30 ml gerasperde, vars gemmer
■ 30 ml suurlemoensap
■ 1 rooi brandrissie, ontpit en fyn gekap
■ 15 ml olie
■ Sout en vars gemaalde swartpeper na smaak

Sny die hoenderborsies in dun repies. Meng die heuning, sojasous, asyn, gemmer, suurlemoensap en brandrissie saam en giet oor die hoenderrepies. Dit kan verkoel vir minstens 1 uur. Haal uit die yskas en laat kamertemperatuur bereik.

Verhit die olie in ’n pan of wok tot baie warm. Skep die hoenderrepies met ’n gaatjieslepel of tang uit die marinade en laat goed afdrup voor jy die repies in lotte in die baie warm olie bruin braai.

Geur met sout en peper na smaak. Voeg die spinasie (of ander groente) by en roerbraai vir ’n paar sekondes. Voeg die res van die marinade by en roerbraai tot klewerig. Sit voor op gestoomde wit rys of noedels. Lewer 6 porsies.

Hou die geurmiddels eenvoudig sodat die natuurlike geure van die groente tot hul reg kan kom.

■ 8 hoenderporsies (ek gebruik graag dye en boudjies)
■ 30 ml olyfolie
■ 5 ml gemaalde koljander
■ 5 ml komyn
■ 2 ml kaneel
■ Sout en vars gemaalde swartpeper na smaak
■ 600 g wintergroente van jou keuse, voorberei (geskil indien nodig en in hapgrootte porsies gesny)

Voorverhit die oond tot 190°C. Smeer die hoenderporsies met ’n bietjie van die olyfolie. Meng die speserye en besprinkel elke porsie daarmee. Geur met sout en swartpeper.

Giet die res van die olyfolie in ’n oondbak en voeg die groente by. Meng liggies om die groente met ’n dun lagie olie te bedek. Bak die hoenderstukke (met die velkante na bo) bo-op die groente en geur weer met sout en peper. Bedek en bak vir 30 minute.

Verwyder die deksel en bak vir ’n verdere 30 minute tot die hoender en groente gaar is. Sit voor met rys of koeskoes en ’n slaai of twee. Lewer 4-6 porsies.

■ 250 ml wit- of geelmieliemeel
■ 750 ml water
■ Sout na smaak
■ 500 ml koekmeel
■ 3 ml mosterdpoeier
■ 2 eiers, geklits
■ 500 ml gerasperde cheddarkaas
■ 250 ml fyn biltong
■ 20 ml bakpoeier
■ Olie vir braai

Verhit die mieliemeel, water en ’n knippie sout saam in ’n kastrol, terwyl jy aanhoudend roer, tot kookpunt. Prut, terwyl steeds geroer word, ’n dikkerige slap pap. Laat effens afkoel en roer die res van die bestanddele by, tot goed gemeng.

Verhit genoeg olie in ’n pan en braai teelepels vol van die papmengsel in matige warm olie tot goudbruin en gaar. Dreineer op kombuispapier en sit louwarm voor. Lewer 50 poffertjies.

Die geheim van die beste mieliemeel-tjips is om die pap goed te geur. Ek gebruik parmesaan en lekker baie kruie. Roosmaryn of tiemie werk wonderlik, veral as jy die tjips saam met ’n steak wil voorsit.

■ 2 liter goeie hoender- of groenteaftreksel
■ 1 pakkie (500 g) geelmieliemeel of polenta
■ 250 ml fyngerasperde parmesaankaas
■ 5 ml jong roosmarynblaartjies, baie fyn gekap
■ 5 ml tiemieblaartjies, baie fyn gekap
■ Sout en vars gemaalde swartpeper na smaak
■ Olie vir braai
■ 2 takkies vars roosmaryn

Verhit die aftreksel in ’n groot kastrol tot kookpunt. Voeg die mieliemeel by die kokende aftreksel terwyl jy aanhoudend roer met ’n draadklitser. Laat die pap vir minstens 20 minute prut.

Sit die stoofplaat af, sit die deksel op en laat staan die pap in vir warm pot vir nog 20 minute, tot heeltemal gaar. Roer die kaas en fyngekapte kruie by en geur na smaak met sout en peper. Smeer ’n bakplaat goed met olyfolie en gooi die pap daarop uit. Smeer gelyk en laat heeltemal afkoel, tot koud.

Keer die ferm pap op ’n werksoppervlak uit en sny dit in tjips met ’n skerp mes. Verhit genoeg olie tot warm en braai die tjips daarin tot halfgaar. Voeg die roosmaryntakkies by en braai verder tot die tjips goudbruin en bros is. Dreineer op kombuispapier en hou warm.

Sit voor met steak, ’n lekker sous en slaai of groente van jou keuse. Lewer 8-10 porsies.

Jy kan dit met teetyd, vir nagereg of, soos pampoenkoekies, as bykos voorsit.

■ 250 ml witmieliemeel
■ 500 ml melk
■ 250 ml water
■ 2 eiers, geklits
■ 500 ml koekmeel
■ 20 ml bakpoeier
■ 5 ml kaneel
■ 100 ml strooisuiker
■ Olie, vir braai

Verhit die mieliemeel, water en ’n knippie sout saam in ’n kastrol, terwyl jy aanhoudend roer, tot kookpunt. Prut, terwyl steeds geroer word, ’n dikkerige slap pap. Laat effens afkoel en roer die res van die bestanddele by, tot goed gemeng.

Verhit genoeg olie in ’n pan en braai teelepelsvol van die papmengsel in matige warm olie tot goudbruin en gaar. Skep uit die olie, dreineer vir ’n paar sekondes op kombuispapier en skep in ’n bak met kaneelsuiker. Skud liggies sodat elke poffertjie met ’n lagie kaneelsuiker bedek is.

Sit louwarm of teen kamertemperatuur voor. Lewer 50 poffertjies.

■ 375 ml koekmeel
■ 250 ml mieliemeel of fyn polenta, plus 250 ml ekstra, vir rol
■ 5 ml sout
■ 20 ml bakpoeier
■ 10 ml suiker
■ 1 blik (410 g) geroomde suikermielies
■ 2 eiers
■ 125 ml karringmelk of suurmelk
■ 30 ml olyfolie
■ 100 ml basielpesto

Voorverhit die oond tot 180°C en smeer ’n koekpan van 22 cm goed. Voer die pan uit met bakpapier (boom en kante) en smeer weer.

Meng die koekmeel, 250 ml mieliemeel of polenta, sout, bakpoeier en suiker saam in ’n bak en maak ’n holte in die middel. Klits die mielies, eiers, melk en olyfolie saam en voeg by die droë bestanddele. Roer tot ’n sagte deeg vorm.

Skep die ander 250 ml mieliemeel of polenta in ’n bak. Skep groot lepels van die deeg in die bak mieliemeel en rol dit liggies daarin. Skud oortollige mieliemeel af en pak die mieliemeelbedekte deegbolle teen mekaar in die pan. Maak met ’n skerp mes ’n snit op elke bol deeg en skep ’n bietjie pesto in elke snit.

Bak die brood vir 50-60 minute, of tot deurgaar. (Die brood is gaar as jy ’n toetspen of sosatiestokkie deur die hoogste deel druk en dit skoon uitkom.) Laat vir 15-20 minute in die pan afkoel.

Sit louwarm voor met sagte botter en gerasperde kaas. Lewer 8-10 porsies.

Die bolaag se sterkheid sal bepaal word deur die soort Chakalaka wat jy koop. Vir my het die matige weergawe genoeg byt, maar as jy van brandkos hou, koop die warm weergawe en gebruik dit vir die bolaag.

Paplaag
■ 750 ml water of ligte hoender- of groenteaftreksel
■ 250 ml geelmieliemeel of polenta
■ Sout en vars gemaalde swartpeper na smaak
■ Klontjie botter
■ 250 ml gerasperde kaas

Chakalaka-bolaag
■ 30 ml olie
■ 1 ui, gekap
■ 2 knoffelhuisies, fyn gekap
■ 1 blik (410 g) tamatiepuree
■ 15 ml tamatiepasta
■ 1 blik (410 g) Chakalaka
■ Sout, peper en suiker na smaak
■ 1 takkie vars roosmaryn

Voorverhit die oond tot 180°C en smeer ’n oondbak van 20 cm x 30 cm met botter of olie.

Verhit die water of aftreksel in ’n kastrol tot dit vinnig kook. Gooi die polenta by en klits met ’n draadklitser tot goed gemeng. Draai die hitte laag, bedek die pot en laat prut die polenta rustig vir minstens 20 minute. Roer nou en dan om te keer dat dit aanbrand.

Sodra die polenta gaar is, geur met sout en peper na smaak, roer ’n klontjie botter en die gerasperde kaas by en skep dit in die voorbereide oondbak. Smeer gelyk en hou eenkant.

Vir die bolaag: Verhit die olie en braai die ui stadig daarin tot goudbruin en sag. Voeg die knoffel by en braai tot geurig. Voeg die res van die bestanddele by en verhit tot kookpunt. Prut die sous tot dit effens afgekook en geurig is.

Haal die roosmaryntakkie uit en gooi dit weg. Skep die sous op die paplaag in die oondbak, bedek met foelie en bak vir 30 minute. Sit warm voor met braaivleis. Lewer 8 porsies.

Ek maak dit met enigiets wat in my yskas en koskaste is – tuna, spekvleis, maalvleis en watter groente ek ook al beskikbaar het. Die moontlikhede en variasies wat jy hiermee op die proef kan stel, is eindeloos.

■ 1 pak (500 g) spaghetti
■ 10 ml olie
■ 10 ml botter
■ 2 uie, grof gekap
■ 2 knoffelhuisies, fyn gedruk
■ 1 pakkie (200 g) gerookte ham, gesnipper
■ Sout en vars gemaalde swartpeper na smaak
■ 200 g broccoli, in blommetjies gesny
■ Skeut vars suurlemoensap
■ 6 ekstragroot eiers
■ 125 ml room
■ 30 ml mayonnaise

Voorverhit die oond tot 180°C en smeer ’n losboomkoekpan van 22 cm goed met olie. Kook die spaghetti in ’n pot vinnig kokende soutwater tot gaar, maar steeds ferm.

Terwyl die pasta kook, verhit die olie en botter en braai die uie en knoffel daarin tot sag. Voeg die ham by en braai vir ’n paar minute. Geur na smaak met sout, peper en suurlemoensap.

Ongeveer 5 minute voor die einde van die pasta se kooktyd, voeg die broccoli by die pasta in die kastrol en kook dit verder sodat die pasta en broccoli saam gaar word. Dreineer en skep die pasta-en-broccolimengsel in die voorbereide pan.

Klits die eiers, room en mayonnaise saam en giet oor die pasta. Sit die pan op ’n vel foelie neer en druk die foelie stewig teen die pan vas sodat enige eiervla wat dalk uit die pan mag lek, nie brand in die oond nie.

Bak die spaghettikoek vir ongeveer 30 minute, of tot goudbruin en ferm. Laat vir ’n paar minute in die pan afkoel voordat jy dit uitkeer. Sit voor met ’n groenslaai. Lewer 6 porsies.

■ 300 g lintnoedels van jou keuse
■ 30 g botter
■ 15 ml olyfolie
■ 1 prei, fyn gesny
■ 250 g liggaar steak, in dun repies gesny
■ 30 ml pietersielie, fyn gekap
■ Sap en skil van 1 klein suurlemoen
■ 2 knoffelhuisies, grof gekap
■ 1 blik (410 g) gekapte tamaties
■ 125 ml room
■ Knippie suiker
■ Sout en vars gemaalde swartpeper
■ 200 ml gerasperde parmesaankaas

Kook die pasta in vinnig kokende soutwater tot gaar, maar steeds ferm.

Terwyl die pasta kook, verhit die botter en olyfolie en braai die prei daarin tot sag. Voeg die steakrepies by, asook die pietersielie, sap en skil van die suurlemoen, knoffel en tamaties.

Roer die room en ’n bietjie suiker deur die sous. Geur na smaak met sout en vars gemaalde swartpeper. Dreineer die pasta. Meng die steak-en-tamatiesous met die gaar pasta. Sit voor saam met parmesaankaas. Lewer 4 porsies.

Soms kan hulle self nie glo die reuseklip waar die kransduiwe so graag nesskop, staan reg voor hul huis op die plaas Albina nie, se Aletta Engelbrecht. Mense ry kilometers ver om te kom aansit by Bosduifklip, die Engelbrechts se plaasrestaurant buite Lambertsbaai, wat hulle onder dié unieke klip staangemaak het.

Oor die jare heen het dit ’n geliefde kuier-, eet- en trouplek geraak en in die blommetyd besoek busvragte toeriste Bosduifklip om te kom proe wat Kobus en Aletta aanbied. Gebraaide snoek, skaapboud op die spit, soetpatats, plaasbrood, souskluitjies, en hul spesiale mosselsosaties is maar net ’n paar van die lekkernye wat jy hier kan kom proe.

Die resep: Bosduifklip-mosselsosaties (Kyk die video onder aan resep)
■ 1 pak (250 g) repiespek
■ 4-5 agurkies
■ 4 pynappelringe
■ 500 ml bevrore mosselvleis

Laat week ’n paar sosatiestokkies van hout in water.
Knip elke repie spek in die helfte en sny die agurkies en pynappelringe in klein stukkies. Hou eenkant. Ontdooi die mosselvleis en maak dit goed skoon.
Draai elke stukkie mosselvleis in ’n stukkie spek toe en ryg dit op die sosatiestokkies, afgewissel met stukkies agurkie en pynappel.
Braai die sosaties vir 15-20 minute oor matige kole of tot die spek bros en gaar is.
Lewer ongeveer 35 happies.

Volgende week: Varkvleis op die vuur by die Louws van Bulshoek buite Clanwilliam. Skakel op Woensdag om 18:30 in op VIA (kanaal 147) vir nuwe episodes van Plaaskombuis.

MONSANTO is die trotse borg van die televisieprogram Plaaskombuis op VIA (DStv-kanaal 147), Woensdae om 18:30. Dit word aangebied met die samewerking van Landbouweekblad.

■ 500 g (1 pak) pasta van jou keuse
■ 15 ml olie
■ 1 pak (250 g) spekvleis, gesnipper
■ 1 ui, gekap
■ 3 knoffelhuisies, fyn gekap
■ 30 ml koekmeel
■ 500 ml melk
■ 6 00 g spinasie, gewas, are verwyder en fyn gesnipper
■ Sout en vars gemaalde swartpeper na smaak

■ 2 snye dag-oue bruinbrood
■ 60 ml gesmelte botter

Voorverhit die oond tot 180°C. Kook die pasta in ’n groot kastrol met vinnig kokende water tot gaar maar steeds ferm.

Terwyl die pasta kook, verhit die olie in ’n pan en voeg die spekvleis by. Braai die spek tot gaar, maar nie bros nie. Voeg die ui en knoffel by en braai tot die ui sag is. Sprinkel die meel oor en verhit tot die mengsel borrel. Voeg die melk by en verhit, terwyl geroer word, tot kookpunt.

Prut, terwyl jy roer, tot die sous effens verdik is. Verwyder van die hitte en roer die spinasie by. Dreineer die pasta goed en voeg dit ook by. Skep in ’n oondbak.

Verwerk die brood in ’n voedselverwerker tot krummelrig en voeg die gesmelte botter by. Pols vir nog ’n paar sekondes. Skep die krummels op die pasta en bak vir 20-30 minute tot die pasta borrelend en die krummels bros en goudbruin is.

Sit voor met slaaie van jou keuse. Lewer 6 porsies.

Die kombinasie van soet botterskorsie, sout, romerige kaas en vars basiliekruid is een van die bestes. Die gereg kan as hoof- of bygereg voorgesit word.

■ 1 middelslag-botterskorsie, geskil, pitte verwyder en in blokkies gesny
■ 1 ui, in dun wiggies gesny
■ 3 knoffelhuisies, in skil
■ Sout en vars gemaalde swartpeper
■ 5 ml fyn komyn
■ 300 g pasta van jou keuse
■ 2 wiele fetakaas
■ 125 ml vars basiliekruidblare
■ Wiggie suurlemoen
■ 100 ml olyfolie
■ Sout en vars gemaalde swartpeper na smaak

Voorverhit die oond tot 200°C en skep die botterskorsie, ui en knoffel in ’n oondbak.

Geur goed met sout en peper en sprinkel die komyn oor. Meng liggies. Oondrooster vir ongeveer 30 minute, of tot die botterskorsie gaar is en die hoekies begin verkleur. Skep die geroosterde knoffelhuisies uit en hou eenkant.

Terwyl die groente oondrooster, kook die pasta in ’n groot pot vinnig kokende soutwater tot gaar, maar steeds ferm. Meng die pasta met die geroosterde groente en krummel die fetakaas grof bo-oor.

Sit die helfte van die basiliekruidblare in ’n stewige beker en kneus dit met die agterkant van houtlepel. Voeg die olyfolie by en hou aan om die blare met die houtlepel te kneus en sodoende die olie te geur. Druk ’n wiggie suurlemoen oor die basiliekruidblare in die olie en meng dit goed.

Druip die suurlemoen-basiliekruidolie oor die pastagereg. Kap die res van die basiliekruidblare fyn en sprinkel dit bo-oor. Geur met sout en peper en sit voor teen kamertemperatuur. Lewer 4 porsies.

■ 300 g pasta van jou keuse
■ 5 repe spekvleis, gesnipper
■ 2 blikke (170 g elk) tuna, gedreineer
■ 100 ml mayonnaise
■ Sout en vars gemaalde swartpeper na smaak
■ 1 blik (410 g) botterbone, gedreineer en goed afgespoel
■ 1 pakkie (100 g) ontpitte groen olywe, gedreineer en gehalveer
■ Groot hand vol geblansjeerde groenbone
■ 45 ml olyfolie
■ 45 ml vars suurlemoensap

Kook die pasta in vinnig kokende soutwater tot gaar, maar steeds ferm.

Terwyl die pasta kook, braai die spekvleisstukkies in ’n droë pan tot bros. Dreineer op kombuispapier en hou eenkant. Meng die tuna en mayonnaise, geur met sout en peper en hou eenkant.

Sodra die pasta gaar is, dreineer en meng met die spek, tuna-en-mayomengsel, bone, olywe en geblansjeerde groenbone. Meng die olie en suurlemoensap en drup dit oor die slaai. Meng alles liggies deur en sit voor. Lewer 4-5 porsies.

■ 30 ml olie
■ 2 uie, fyn gekap
■ 2 knoffelhuisies
■ 15 ml kerriepoeier
■ 1 blik (425 g) sardyne in tamatiesous
■ 1 blik (410 g) botterbone, gedreineer
■ 2 snye brood
■ 100 ml melk
■ Sout en vars gemaalde swartpeper

Bolaag
■ 3 eiers
■ 125 ml melk
■ 15 ml vars koljanderblare

Voorverhit die oond tot 180°C en smeer ’n middelslag-oondbak.

Verhit die olie en braai die ui stadig tot sag. Voeg die knoffel en kerrie by en braai tot geurig. Keer die sardyne in ’n bord uit en gebruik ’n vurk om elke vissie middeldeur te breek. Haal die sagte middelgraat uit en gooi dit weg. Vlok die sardyne grof en voeg dit saam met die bone (en die tamatiesous uit die blik) by die uie en knoffel in die pan.

Sit die brood in ’n papbak en giet die melk oor. Laat week vir ’n paar minute en druk dit dan fyn met ’n vurk. Voeg die broodmengsel by die uie, sardyne en bone in die pan. Verhit tot kookpunt en prut liggies. Geur na smaak met sout en vars gemaalde swartpeper. Klits die eiers en melk saam en geur liggies met sout en peper.

Giet oor die sardynvulsel. Trek die koljanderblaartjies van die stingels af en sit dit op die eiervlalaag. Bak vir sowat 30 minute, of tot die eiervla gestol en goudbruin en die vulsel deurwarm is. Sit die bobotie voor met blatjang, gestoomde jasmyn- of basmatirys en ’n tamatie-en-uieslaai.
Lewer 6 porsies.